Banat ( Leaderboard Top ), pagematch: 1, sectionmatch: 1

Cavaliers pilde gihapon

CEBU, Philippines — Naalarma na  si LeBron James ug ang Cleveland Cavaliers human masagunsonan og tulo ka pilde karon nga season sa National Basketball Association.

Ang Cavaliers napilde na sab, ning higayon batok sa Indiana Pacers sa ligas kaayo nila nga duwa sa iskor nga 95-97 kagahapon didto sa Indianapolis.

Bisan pa sa grabe niyang paningkamot  ug hapit pa gani siya  mirehistro og triple-double  sa iyang 27 puntos, 11 ka rebounds ug walo ka assists, pakyas si James sa pagputol sa nagkutay nila nga  pilde.  Sa wala pa ang duwa batok Pacers, ang Cavs gipahamtangan na og pilde sa Minnesota Timberwolves ug Toronto Raptors.

Ang four-time MVP may kahigayonan pa unta nga moluwas sa Cavs, apan mikagar iyang  katapusang itsa.

Si Lance Stephenson adunay 16 puntos ug 11 ka rebounds alang sa Pacers nga misulod na sa top eight sa Eastern Conference  uban ang  22-20 nga baraha, samtang ang Cavs pabilin sa ikatulong dapit sa ilang 26-16 nga baraha.

Dili sama sa Cavs, ang karibal nila nga Golden State Warriors yano nga milampurnas sa host team  Milwaukee Bucks, 108-94 didto sa BMO Harris Bradley Center.

Ang Warriors niduwa nga wala si  Stephen Curry, apan gitubos   nilang  Kevin Durant ug Draymond Green ang opensiba nga nagkumboya’g 47 puntos. Si Durant miburak og 26 puntos, samtang si Green mibahog og 21 puntos sa maong kadaogan.

Sa uban pang mga resulta, ang Minnesota   Timberwolves mipilde sa New York Knicks sa iskor nga 118-108, ang Houston Rockets milubong sa Phoenix Suns, 112-95, ang Washington Wizards mibaraw sa Orlando Magic, 125-119.

Midaog sab ang   New Orleans Pelicans human makaipsot sa mga kamot sa Portland TrailBlazers, 119-113, ang Brooklyn Nets mibitik sa Atlanta Hawks, 110-105 ug ang Denver Nuggets midaog sa Memphis Grizzlies sa iskor nga 87-78.

  • Follow Us: