Banat ( Leaderboard Top ), pagematch: 1, sectionmatch: 1

Cebu City scholarship

Magpasalamat gyud ko ni Mayor Tomas  Osmeña kay siya maoy nagmugna sa programa sa dakbayan nga kadtong mogradwar sa mga public high schools dinhi sa siyudad, himoong city scholars aron makapadayon pagtungha sa koliheyo.

Pasalamatan usab nako si kanhi mayor Mike Rama kay gipadayon niya ang programa nga nasugdan ni Tommy, ug nakatabang usab siya sa kalampusan sa akong anak. Karon, natuman gyud ang pangandoy sa akong anak nga mahimong registered criminologist.

Nindot gyud kaayo kining programa sa dakbayan sa Sugbo nga pagtabang aron ang mga anak sa kabus nga pamilya nga nagtungha sa public high schools, makapadayon sa ilang pagtuon sa koliheyo. Congrats to Rene Jefferson Moreno Borromeo.

Pero mas malipay gyud ko kon makasulod na siya sa Philippine National Police (PNP) nga maoy iyang pangandoy sukad pa kaniadto. Dako na kaayo’g sweldo ang mga polis karon. Bisan og ang ranggo Police Officer-1 lang, hapit P30 mil na ang sweldo.

* * *

Tambag gyud nako sa mga polis nga kay dagko na man mo og sweldo, bugtii sab intawon og maayong serbisyo ang kagamhanan, dili kay ipasuwabi ra sab ninyo ang katapolan.

Dako kaayo kamo og utang kabubut-on ni Presidente Duterte nga gidoble ang inyong mga sweldo, agi og pagtuman sa iyang campaign promise. Gusto ni Duterte nga masulbad na ang problema sa drugas.

Gusto usab ni Presidente Duterte nga mahimoan og hugtanay nga kampanya ang illegal gambling, sama niining mikatap na pag-ayo nga illegal swertres.

Unta, ang bag-ong direktor sa kapolisan dinhi sa dakbayan sa Sugbo, mohingusog unta sa kampanya. Nasayod gyud kaayo ang mga polis kon kinsa ang mga nagpasiugda sa illegal swertres dinhi sa siyudad, ang tulo ka dagkong financier niini anaa sa Barangay Suba ug Pasil.

Duna sa’y insik nga anaa sa Taboan nga nalambigit sa maong ilegal nga sugal. Angay na nga aksiyonan sa kapolisan kay tiaw mo ba’y ang pipila ka tanod sa Guadalupe ug Lahug, nagsilbe na kuno nga mga kolektor sa halin sa ilegal swertres?

Dugay na kaayo nga ang mga kapitan niining duha ka barangay, nagpakahilom lang. Ang report nga miabot nako mao nga may konsehal kuno sa Guadalupe nga nag-finance sab og illegal swertres, kaila mo niya?

Susama ra kini sa usa ka opisyal sa barangay Suba nga tunog kaayo ang ngalan sa iyang pagka illegal swertres financier. Ang laing mga financier diha mao kining usa ka Tigul, Rommel ug Randy. Nganong wala man kini himoi og operation sa mga polis?

  • Follow Us: