Banat ( Leaderboard Top ), pagematch: 1, sectionmatch: 1

Abuso

Daghan kuno sa mga tagdumala og balay patigayon sa Barangay Apas ang mireklamo sa pagpangayo og kwarta sa mga sakop sa Barangay Mayor’s Office (BMO) alang sa ilang Sinulog contingent.

Matud sa report nga nagkutlo ni Kapitan Ramil Ayuman, ang gireklamohan sa mga negosyante kay ingon sa pinugsanay ang ilang gihimo nga dala na ang pagpanghulga.

Tiaw mo ba’y P100,000 ngadto sa P1 million ang gipangayo. Kadtong dili mohatag, hulgaon nga ipiton ang ilang business permit sa Cebu City Hall.

Human masayod sa gibuhat sa iyang mga tawo, wa’y lipud-lipod nga gipahibawo ni Mayor Tomas Osmeña nga iyang tangtangon ang naghimo niini.

Matud ni Osmeña nga base sa kasayuran nga iyang nahipos, si Renato Jardaleza maoy nagpasiugda sa pagpangayo og kwarta gikan sa mga balay patigayon pinaagi sa pagpadala og solicitation letter nga may official seal sa dakbayan.

Matud sa mayor nga si Jardaleza sab ang giingong nanghulga sa mga negosyante, kon dili kini mosanong sa ilang gipangayo. Nunot niini gitangtang ni Osmeña si Jardaleza isip sakop sa BMO sa Barangay Apas.

Ang gipakita ni Osmeña dalaygon. Kini maoy kinaiya sa usa ka maayong lider, ug saludo ko niya dihang iyang gibutyag nga iyang giisip si Jardaleza nga sad-an hangtud nga kini makapamatuod nga wa siya’y sayop nga nabuhat.

Apan mas mahurot ang akong bilib ni Osmeña kon lakip sa iyang tangtangon mao ang namirma sa solicitation.

Sigun sa kopya sa solicitation letter gikan sa BMO sa Apas, dunay tulo ka tawo ang namirma ug wa’y apil niini si Jardaleza.

Ang tulo mao ang pangulo mismo sa BMO nga si Joel Trompeta, ang marketing head sa ilang Sinulog contingent nga si Teresa Verzosa, ug ang pangulo sa contingent nga si Rey Suelto.

Mas motuo ang publiko nga sinsiro ang mayor sa iyang kampanya batok sa mga binuang ug abuso sa iyang mga tawo kon ang tanang nipirma sa solicitation taktakon.

Bisan pa og atong tugotan nga igo lang sila nga nipirma, apan dili malalis ang ilang tulobagon sa ilegal nga paggamit sa official seal sa dakbayan.

  • Follow Us: