Banat ( Leaderboard Top ), pagematch: 1, sectionmatch: 1

EDITORYAL - Debosyon dili commercialization

Makaayo sa Sinulog ug sa Piyesta Senyor sa Sugbo ang pagdili sa inom ingon man ang pagpahigayon og street parties duol sa mga rota nga subayon sa mga mosalmot sa Sinulog Grand Parade kay malikayan man ang kasamok nga maglambigit og mga hubog. Maayo nga naminaw si Mayor Tomas Osmeña sa mga reklamo sa publiko batok niining mga law-ay nga kalihokan nga nitabon na hinuon sa tinud-anay nga katuyoan pagsaulog sa kapistahan nga mao ang debosyon ngadto sa Balaang Bata.

Ang mga tawo makatimaan ug nakaobserbar gyud sa kadako na sa kalainan sa Sinulog ug sa kapistahan ni Señor Santo Niño kaniadto, mga 20 ka tuig na ang nakalabay, kon itandi karong panahona. Kaniadto, dako kaayo ang atensiyon nga gihatag sa relihiyosong aspeto ug sa cultural aspect, sama sa pagsayaw og Sinulog agi og pagyukbo ni Santo Niño ug ang kulturanhong kalihokan.

Nabantayan nga sa duha, ang kultural maoy dako kaayo ang pagkausab kay na-commercialized na pag-ayo ang Sinulog nga sayaw man unta kini isip halad ngadto sa Balaang Bata, apan karon wa na kaayo kini makita ngadto sa ubang dancers, kay maoy nagpasulabi ang komersyo. Makasabot hinuon ang publiko bahin niini kay kon dili magpalabwanay sa gasto aron monindot ang ilang contingents, lupigon gyud sila sa tapad, sa ubang mananayaw.

Kabahin sa mga street parties ug liquor ban, daghan ang mabulahan niini kay mas luwas man sa mga pamilya nga manuroy kon wa’y mga hubog ug badlungong kabataan nga magsamoksamok sa kadalanan. Maghatag kini og kahigayonan sa mga balay patigayon nga layo sa sentro sa kalihokan nga mokita usab og daku-dako nga halin nianang adlawa. Kining gibuhat sa mayor, makaayo kini dili lang sa Sugbo, kon dili, sa katuyoan sa pagpahigayon og Sinulog nga mao ang pagdebosyon nga diin nabantog niini ang mga Sugboanon.

  • Follow Us: